სისხლის საქმე საქართველოში, თქვენ კი საზღვარგარეთ ხართ

სისხლის სამართლის საპროცესო კოდექსით, თუ ბრალდებული იმალება, სასამართლოს შეიძლება წარედგინოს შუამდგომლობა მისთვის პატიმრობის შეფარდების შესახებ. დაპატიმრების შემდეგ ბრალდებული გამოძიების ადგილას მიყვანიდან არაუგვიანეს 48 საათისა მაგისტრატ მოსამართლეს უნდა წარუდგინონ; თუ ძებნილი უცხოეთში დააკავეს — საქართველოში გამოძიების ადგილზე ჩამოყვანიდან არაუგვიანეს 48 საათისა (206-ე მუხლის მე-10 ნაწილი).

ვარკვევთ, რა სტატუსი გაქვთ საქმეში, რა ბრალდებაა და გამოცხადებულია თუ არა ძებნა; ვიცავთ თქვენს ინტერესებს გამოძიებასა და სასამართლოში და ვგეგმავთ დაბრუნებას — ისე, რომ პირველივე წუთიდან ადვოკატი გყავდეთ.

საქმის დაუსწრებლად განხილვა

• თუ ბრალდებული სასამართლოში გამოცხადებას თავს არიდებს, საქმე შეიძლება მის დაუსწრებლად განიხილონ (189-ე მუხლი)
• ასეთ საქმეში ბრალდებულის ადვოკატის მონაწილეობა სავალდებულოა (189-ე მუხლი)
• დაუსწრებლად გამოტანილი გამამტყუნებელი განაჩენის გასაჩივრება 1 თვეში შეიძლება — დაპატიმრებიდან ან სათანადო ორგანოში გამოცხადებიდან; ან განაჩენის გამოცხადებიდან, თუ ითხოვთ, რომ სააპელაციო საჩივარი თქვენი მონაწილეობის გარეშე განიხილონ (292-ე მუხლის მე-3 ნაწილი)

ძებნა და პასპორტი

ძებნილი ბრალდებულის ან მსჯავრდებულის საქართველოს მოქალაქის პასპორტის მოქმედება შეიძლება შეჩერდეს სასამართლოს განჩინებით, პროკურორის შუამდგომლობით. ეს ნიშნავს საქართველოდან გასვლისა და საზღვარგარეთ გადაადგილების უფლების შეზღუდვას. შეჩერება გრძელდება განაჩენის აღსრულებამდე ან დევნის შეწყვეტამდე, თუმცა პროკურორს მისი გაუქმება ნებისმიერ დროს შეუძლია. განჩინება საჩივრდება (164-ე და 165-ე მუხლები).

თუ საზღვარგარეთ დაგაკავეს

თუ საქართველოს მოთხოვნით სხვა ქვეყანაში დაგაკავეს, გადმოცემის საკითხს ის ქვეყანა თავისი კანონმდებლობითა და საერთაშორისო ხელშეკრულებებით წყვეტს. საქართველოში ჩამოყვანიდან არაუგვიანეს 48 საათისა სასამართლოს უნდა წარგადგინონ, რომელიც აღკვეთის ღონისძიებას გააუქმებს, შეცვლის ან ძალაში დატოვებს (206-ე მუხლის მე-10 ნაწილი).