ოჯახში ძალადობა სისხლის სამართლის კოდექსის 126¹ მუხლით ისჯება. გარდა ამისა, ოჯახის წევრის მიმართ ჩადენილი ბევრი სხვა დანაშაული „ოჯახურ დანაშაულად“ ითვლება.
ვინ ითვლება ოჯახის წევრად
კანონით ოჯახის წევრია არა მხოლოდ მეუღლე და შვილი, არამედ მშობლები, და-ძმა, ბებია-ბაბუა, შვილიშვილი, მეუღლის მშობლები, არარეგისტრირებულ ქორწინებაში მყოფი პირი და ყოფილი მეუღლეც.
რა ითვლება ოჯახში ძალადობად
ოჯახის ერთი წევრის მიერ მეორის მიმართ ძალადობა, სისტემატური შეურაცხყოფა, შანტაჟი ან დამცირება, რამაც ფიზიკური ტკივილი ან ტანჯვა გამოიწვია.
სასჯელი
- საზოგადოებისათვის სასარგებლო შრომა 80-დან 150 საათამდე ან თავისუფლების აღკვეთა 2 წლამდე
- არასრულწლოვნის, ორსულის ან შეზღუდული შესაძლებლობის მქონე პირის მიმართ, არასრულწლოვნის თანდასწრებით, ორი ან მეტი პირის მიმართ, ჯგუფურად ან არაერთგზის — 1-დან 3 წლამდე
- ორივე შემთხვევაში სასამართლოს შეუძლია იარაღთან დაკავშირებული უფლებების შეზღუდვაც
თუ ბრალდებული ხართ
- ნუ დაუკავშირდებით დაზარალებულს — ამან შეიძლება ბრალდება დაამძიმოს ან პატიმრობის საფუძველი გახდეს
- დაიცავით შემაკავებელი ან დამცავი ორდერის პირობები
- ჩვენება ადვოკატის გარეშე ნუ მისცემთ
თუ დაზარალებული ხართ
დარეკეთ 112-ზე. პოლიციას შეუძლია მოძალადის მიმართ შემაკავებელი ორდერის გამოცემა. ადვოკატი დაგეხმარებათ დამცავი ორდერის მოთხოვნაში და თქვენი ინტერესების დაცვაში სისხლის სამართლის საქმეზე.
სამართლებრივი საფუძველი
ოფიციალური ტექსტები — საქართველოს საკანონმდებლო მაცნე (matsne.gov.ge).
სტატია ზოგადი ინფორმაციაა და არ ცვლის ადვოკატის კონსულტაციას თქვენს კონკრეტულ საქმეზე.