აზარტული თამაშების აკრძალვა ოჯახის წევრისთვის

დამოკიდებულ პირთა სიას შემოსავლების სამსახური აწარმოებს. სიაში მოხვედრა ორი გზით შეიძლება: თავად პირის განცხადებით შემოსავლების სამსახურში ან მოსამართლის ბრძანებით, რომელსაც ოჯახის წევრის განცხადებით გამოსცემს. ოჯახის წევრად ითვლება მშობელი, მეუღლე, შვილი ან ის, ვინც ამ პირთან მუდმივად ცხოვრობს (ადმინისტრაციული საპროცესო კოდექსის 21⁸⁵–21⁸⁶ მუხლები).

სიაში შეყვანილი პირი 5 წლით ვერ შევა კაზინოში ან სათამაშო სალონში და ვერ ითამაშებს ტოტალიზატორზე თუ ონლაინ: თამაშის ორგანიზატორი ყოველი მოთამაშის შესახებ შემოსავლების სამსახურს ამოწმებს. სიაში მხოლოდ საქართველოს მოქალაქის შეყვანა შეიძლება.

როგორ მიმდინარეობს საქმე სასამართლოში

1. ოჯახის წევრი წერილობით განცხადებას შეიტანს მაგისტრატ ან რაიონულ (საქალაქო) სასამართლოში — იმ პირის საცხოვრებელი ადგილის მიხედვით, ვისი შეყვანაც სიაში სურს. განცხადება სახელმწიფო ბაჟისგან თავისუფალია.
2. განცხადებას ერთვის ნათესაობის დამადასტურებელი დოკუმენტი და მტკიცებულებები: საბანკო ამონაწერები, გადარიცხვები ტოტალიზატორებსა და კაზინოებში, სესხები, მიმოწერა, მოწმეები.
3. მოსამართლე განცხადებას და მასალებს უგზავნის პირს, რომელსაც ის ეხება; მას მიღებიდან 48 საათი აქვს, წერილობით წარადგინოს თავისი მოსაზრება.
4. მოსამართლე 3–5 სამუშაო დღეში გამოსცემს ბრძანებას — ზეპირი მოსმენით ან მის გარეშე, საჭიროების შემთხვევაში დახურულ სხდომაზე. მტკიცების ტვირთი განმცხადებელს ეკისრება.
5. ბრძანება ძალაში მაშინვე შედის. მისი გასაჩივრება სააპელაციო სასამართლოში 3 დღეში შეიძლება; სააპელაციო სასამართლო 5 სამუშაო დღეში წყვეტს და მისი ბრძანება საბოლოოა.

რას აფასებს მოსამართლე

• დამოკიდებულების სიმძიმეს — რამდენად ხშირად და რა თანხებზე თამაშობს
• ოჯახის წევრისთვის მიყენებულ მატერიალურ ზიანს — ვალები, გაყიდული ნივთები, ოჯახის ფული
• საქმის ინდივიდუალურ გარემოებებს — მაგალითად, ჰქონდა თუ არა მკურნალობის ან თამაშის შეწყვეტის მცდელობა

სიიდან ამოღება

სიაში ყოფნის ვადა 5 წელია. ვადაზე ადრე ამოღება შეიძლება მხოლოდ თავად ამ პირის განცხადებით, სასამართლოს ბრძანებით და არა უადრეს 3 წლისა სიაში შეყვანიდან.