# მინდობილობა: სახეები, ვადა, გაუქმება და შემოწმება

რა არის მინდობილობა, რით განსხვავდება გენერალური და ერთჯერადი, როდის სჭირდება ნოტარიუსი, რამდენ ხანს მოქმედებს, როგორ გავაუქმოთ და როგორ შევამოწმოთ.
[სამოქალაქო სამართალი](https://mmlaw.ge/ka/samokalako-samartlis-advokati/) · 18 ოქტომბერი, 2026 · 5 წთ საკითხავი

მინდობილობით სხვა პირს — რწმუნებულს — აძლევთ უფლებას, თქვენი სახელით იმოქმედოს: გაყიდოს ბინა, გააფორმოს მანქანა, წარგადგინოთ სასამართლოში ან აიღოს დოკუმენტი. კანონით, რწმუნებულის მიერ დადებული გარიგება ისე მოქმედებს, თითქოს თავად დადეთ (სამოქალაქო კოდექსის 103–104 მუხლები). ამიტომ მინდობილობა ზუსტად უნდა იყოს შედგენილი.

## მინდობილობის სახეები

სახერისთვისერთჯერადი (სპეციალური)ერთი კონკრეტული მოქმედებისთვის — მაგალითად, კონკრეტული ბინის გაყიდვა ან დოკუმენტის აღება. შესრულებისთანავე წყდებაგენერალურიქონების მართვა და განკარგვა, ბევრი სხვადასხვა მოქმედება. ყველაზე ფართო და ყველაზე სარისკოსასამართლოსთვისსაქმის წარმოება სასამართლოში. სარჩელის შეტანა, მორიგება, გასაჩივრება და თანხის მიღება ცალ-ცალკე უნდა ეწეროსმანქანაზემართვა, გაყიდვა ან გადაფორმება — რაც გინდათ, ის პირდაპირ უნდა ეწეროსბავშვის მგზავრობაზეეს მინდობილობა კი არა, მშობლის ნოტარიულად დამოწმებული თანხმობაა — იხილეთ „ბავშვის საზღვარგარეთ გაყვანა“

## როდის სჭირდება ნოტარიუსი

კანონით, მინდობილობას არ სჭირდება ის ფორმა, რაც თავად გარიგებას, თუ სპეციალური ფორმა დადგენილი არ არის (107-ე მუხლი). პრაქტიკაში უძრავი ქონების, მანქანისა და სასამართლო საქმეებისთვის მინდობილობა, როგორც წესი, ნოტარიუსთან ფორმდება. სასამართლოსთვის მოქალაქის მინდობილობა სანოტარო წესით უნდა დამოწმდეს — ან იმ ორგანიზაციის მიერ, სადაც მუშაობთ ან სწავლობთ, ან საავადმყოფოს ადმინისტრაციის მიერ, თუ იქ მკურნალობთ (სამოქალაქო საპროცესო კოდექსის 96-ე მუხლი).

- საზღვარგარეთ — საქართველოს საკონსულოში ან ადგილობრივ ნოტარიუსთან, აპოსტილით (იხილეთ „მინდობილობა საზღვარგარეთიდან“)

- პენიტენციურ დაწესებულებაში მყოფი პირის მინდობილობას დაწესებულების დირექტორი ამოწმებს

- ადვოკატის უფლებამოსილება „ადვოკატთა შესახებ“ კანონით დადგენილი წესით დასტურდება

## რამდენ ხანს მოქმედებს

კანონი მინდობილობის მაქსიმალურ ვადას არ ადგენს. თუ ვადა მითითებულია, მისი გასვლით წყდება. სამოქალაქო კოდექსის 109-ე მუხლით, მინდობილობა წყდება:

- ვადის გასვლით

- როცა მას გააუქმებთ

- როცა რწმუნებული უარს იტყვის

- დავალების შესრულებით

- მინდობილობის გამცემის გარდაცვალებით

- გამცემის მხარდაჭერის მიმღებად ცნობით — თუ მხარდაჭერა ქონების განკარგვისთვის დაუწესდა

ჯობს, მინდობილობა გონივრული ვადით გასცეთ — მაგალითად, იმდენი ხნით, რამდენიც საქმეს სჭირდება.

## როგორ გავაუქმოთ

მინდობილობის გაუქმება ნებისმიერ დროს შეგიძლიათ; ნოტარიულ მინდობილობას, როგორც წესი, ნოტარიუსთან აუქმებენ. მთავარია, გაუქმების შესახებ აცნობოთ რწმუნებულს და იმ პირებს, ვისთანაც ის თქვენი სახელით მოქმედებს — თორემ გაუქმებას მათ წინააღმდეგ ვერ გამოიყენებთ (108-ე მუხლი). გაუქმების შემდეგ რწმუნებულმა მინდობილობა უნდა დაგიბრუნოთ (110-ე მუხლი). თუ წარმომადგენელი სასამართლოში გყავთ, გაუქმების შესახებ წერილობით აცნობეთ სასამართლოსაც (სამოქალაქო საპროცესო კოდექსის 99-ე მუხლი).

## როგორ შევამოწმოთ, მოქმედებს თუ არა

ყველა სანოტარო მოქმედება ელექტრონულ სანოტარო რეესტრში რეგისტრირდება. ნოტარიული მინდობილობის მონაცემების გადამოწმება შეიძლება my.gov.ge-ზე — „სანოტარო მოქმედებათა ელექტრონული რეესტრი“ — ან ნოტარიუსთან. თუ ბინას ან მანქანას ყიდულობთ და გამყიდველის ნაცვლად რწმუნებული მოქმედებს, მინდობილობა აუცილებლად გადაამოწმეთ და, თუ შესაძლებელია, თავად მესაკუთრესაც დაუკავშირდით.

## რა უნდა ეწეროს მინდობილობაში

- ორივე მხარის სრული მონაცემები

- კონკრეტული უფლებები — რომელი ქონება (საკადასტრო კოდი, მანქანის ნომერი) და რა მოქმედებები

- შეუძლია თუ არა თანხის მიღება და რომელ ანგარიშზე უნდა ჩაირიცხოს

- შეუძლია თუ არა სხვაზე გადანდობა — თუ არ წერია, რწმუნებულმა თავად უნდა იმოქმედოს (711-ე მუხლი)

- მოქმედების ვადა

## ხშირი რისკები

- ზედმეტად ფართო გენერალური მინდობილობა — რწმუნებულს თითქმის ყველაფრის გაკეთება შეუძლია

- რწმუნებულს არ შეუძლია თქვენი სახელით საკუთარ თავთან გარიგების დადება — მაგალითად, თქვენი ბინის საკუთარ თავზე გაყიდვა — თუ ამაზე თანხმობა მინდობილობაში არ წერია (114-ე მუხლი)

- გაუქმების შესახებ მესამე პირებისთვის შეუტყობინებლობა

- სასამართლოს მინდობილობაში მორიგების ან გასაჩივრების უფლება არ წერია — მაშინ წარმომადგენელი ამას ვერ გააკეთებს (სამოქალაქო საპროცესო კოდექსის 98-ე მუხლი)

## როგორ დაგეხმარებით

- მინდობილობის ტექსტს თქვენს საქმეზე მოვარგებთ — ქართულად და, საჭიროებისას, ინგლისურად ან რუსულად

- შევამოწმებთ, საკმარისია თუ არა არსებული მინდობილობა

- მოვაგვარებთ გაუქმებას და მესამე პირების ინფორმირებას

- ვიმოქმედებთ, როგორც თქვენი წარმომადგენელი საქართველოში — სასამართლოში, საჯარო რეესტრსა და სხვა უწყებებში

## სამართლებრივი საფუძველი

- [სამოქალაქო კოდექსი](https://matsne.gov.ge/ka/document/view/31702)

- [სამოქალაქო საპროცესო კოდექსი](https://matsne.gov.ge/ka/document/view/29962)

- [„ნოტარიატის შესახებ“ კანონი](https://matsne.gov.ge/ka/document/view/90928)

ოფიციალური ტექსტები — საქართველოს საკანონმდებლო მაცნე (matsne.gov.ge).

სტატია ზოგადი ინფორმაციაა და არ ცვლის ადვოკატის კონსულტაციას თქვენს კონკრეტულ საქმეზე.
ყველა შემთხვევა ინდივიდუალურია — ნუ იხელმძღვანელებთ ზოგადი ინფორმაციით. კონსულტაციისთვის დაუკავშირდით ადვოკატს.

[სამოქალაქო სამართლის ადვოკატი](https://mmlaw.ge/ka/samokalako-samartlis-advokati/)

## ხშირად დასმული კითხვები

### რამდენ ხანს მოქმედებს მინდობილობა?

კანონი მაქსიმალურ ვადას არ ადგენს. მინდობილობა წყდება მითითებული ვადის გასვლით, გაუქმებით, რწმუნებულის უარით, დავალების შესრულებით ან მინდობილობის გამცემის გარდაცვალებით.

### რით განსხვავდება გენერალური მინდობილობა ერთჯერადისგან?

ერთჯერადი ერთ კონკრეტულ მოქმედებას ეხება და შესრულებისთანავე წყდება. გენერალური ბევრ მოქმედებას მოიცავს — ის უფრო მოსახერხებელია, მაგრამ უფრო სარისკოც.

### შეიძლება მინდობილობის ონლაინ გაცემა?

თუ საქართველოს მოქალაქე ხართ და საზღვარგარეთ იმყოფებით, შესაძლებელია საქართველოს ნოტარიუსთან ვიდეოზარით. სხვა შემთხვევაში მინდობილობას ხელს ნოტარიუსთან ან საქართველოს საკონსულოში აწერთ.

### გამცემის გარდაცვალების შემდეგ მოქმედებს მინდობილობა?

არა. მინდობილობის გამცემის გარდაცვალებით მინდობილობა წყდება (სამოქალაქო კოდექსის 109-ე მუხლი).

### შეუძლია რწმუნებულს უფლებამოსილება სხვას გადასცეს?

მხოლოდ მაშინ, თუ ეს მინდობილობაში წერია ან გარემოებები აიძულებს. სხვა შემთხვევაში დავალება თავად უნდა შეასრულოს (711-ე მუხლი).

## დაკავშირებული თემები

- [#უძრავი ქონება](https://mmlaw.ge/ka/udzravi-konebis-advokati/)

- [#სასამართლო დავები](https://mmlaw.ge/ka/samokalako-samartlis-advokati/)

- [#ემიგრანტებისთვის](https://mmlaw.ge/ka/emigrantebistvis/)

-
- [უძრავი ქონების ადვოკატი](https://mmlaw.ge/ka/udzravi-konebis-advokati/)

-
- [იპოთეკა](https://mmlaw.ge/ka/ipoteka/)

-
- [სამოქალაქო სამართლის ადვოკატი](https://mmlaw.ge/ka/samokalako-samartlis-advokati/)

-
- [იურიდიული დახმარება საზღვარგარეთ მცხოვრები ქართველებისთვის](https://mmlaw.ge/ka/emigrantebistvis/)

-
- [მინდობილობა საზღვარგარეთიდან: როგორ გავცე საქართველოსთვის](https://mmlaw.ge/ka/blogi/mindobiloba-sazghvargaretidan/)

-
- [უცხო ქვეყნის სასამართლო გადაწყვეტილების ცნობა საქართველოში](https://mmlaw.ge/ka/blogi/utskhouri-gadatsqvetilebis-tsnoba/)

-
- [მემკვიდრეობის მიღება · ემიგრანტებისთვის](https://mmlaw.ge/ka/emigrantebistvis/memkvidreobis-migheba/)

-
- [ქონების ყიდვა-გაყიდვა · ემიგრანტებისთვის](https://mmlaw.ge/ka/emigrantebistvis/konebis-qidva-gaqidva/)

ბლოგი

## ყველა სტატია

- [სისხლის სამართალი](https://mmlaw.ge/ka/blogi/utskhoeli-dakaves-sakartveloshi/) — უცხოელი დააკავეს საქართველოში: უფლებები და პირველი ნაბიჯები 11 ოქტომბერი, 2026 · 5 წთ საკითხავი

- [ადმინისტრაციული სამართალი](https://mmlaw.ge/ka/blogi/sakartvelodan-gadzeveba/) — საქართველოდან გაძევება: საფუძვლები, ვადები და გასაჩივრება 11 ოქტომბერი, 2026 · 5 წთ საკითხავი

---
Source: https://mmlaw.ge/ka/blogi/mindobiloba-sakhebi-vada-gauqmeba/ · MMLAW · +995 551 00 43 00 · info@mmlaw.ge